Cube Sugar

真係對工作好失望 
唔係因為人工, 唔係因為升職, 更加唔係因為同 office 既人.
係原來我心目中以為既價值, 居然同公司既價值完全唔一樣.
我以為係好既野, 原來有人並唔係咁諗──魚子醬係好野, 但原來餐廳只賣甘筍仔, 因為班客全部係兔仔.
係貪圖方便, 還是果種先至係公司既發現目標呢?

既然大家已經唔再 share 同一個目標, 我唯有離開 ...
上網睇下 D 工, 無份啱嘅
點解做開發既, 人工永遠都係咁低?! 年資多, 又規定只可以做高層!?
現實係要搵飯食, 理想係永遠只可以想像.

企響旅行社門口望左一陣, 始終無入去.
一個人 join 團, 好似太怪.
我知一定會有人會一個人 join 團, 不過感覺始終有 D 怪異

申請左 Vodafone 既 HSPA 家居寬頻.
反應熱烈, 要 waiting list, 七月四號先有 ... 不過加送多一個月, 總共簽廿五個月; 再用埋中銀信用卡, 就免兩個月月費.
測試過速度, 本地都有 5.xMB; 歐洲就差 D, 得唔夠 2MB.
㨂唔倒心水既電話號碼, 又唯有亂㨂一個啦, 橫掂都無諗著用佢個電話.

政府公務員真係貪得無厭!
人工已經高過人; 做既野又分工仔細, 即係好多野已經唔洗你去做; 福利好過任何人多多聲; 一個禮拜只要返四十個鐘, 仲有一年唔知有幾多假.
而家只係要你共渡時艱, 減少少人工, 你又哩樣又果樣, 反對哩樣又反對果樣.
你做得公務員, 一早已經知道公務員人工係點玩法, 你無理由唔接受哩個事實.
根足遊戲規矩你又唔認數, 你大哂啦!?
你而家同大陸 D 大貪官有乜分別啫? 分別只係大陸貪官, 人人知佢貪, 亦都樂意畀佢貪; 香港既大貪公務員, 你貪完之後, 你做倒乜春出來呀?
叫你做多少少野, 好似要左你條命一樣, 話唔關你事, 唔係你既負責範圍之內. 你咁既工作態度, 何來理據要求加人工呀?!

會錯意, 搞到有 D 難收科.
點好呢?  還是我又畀人玩左?!

假民主  假姿詢
假仁慈地問我有得㨂搬唔搬, 我話唔搬. 你又話唔可以唔搬, 一定要搬.
如果係一定既要做既事, 又何必要問我意見呢?!
從來, 所有關係都係『give and take』, 一方願意 give away 一 D 野以 take 一 D 好野.
我 give away 我可以選擇既權利, 但我 take 倒 D 乜野? 要我 give 既野, 亦唔係我願意既, 何來合理?
我唔要所謂既坐埋一齊. 我要一個 open space office. 所謂既坐埋一齊, 只係方便你監察我, 而家已經有夠多既監察啦. 況且, 我從來好公開唔怕任何監察.
就算坐埋一齊, 我都睇唔出有乜互相溝通既地方, 你做既野我唔會做; 我做緊既野, 我叫你做, 你一定唔肯做. 何來合作、溝通?
同辦公唔同食飯, 咁又何來溝通?
要員工工作有生產力, 必須要員工感到返工係愉悅既. 我唔高興既時候, 又何來工作效率?
我見倒既野, 只係事情既一少部份, 我既知情權響邊處? 我既選擇權又畀乜人侵吞左?!

一年一度既 A-Level 又放成績喇 ... 努力先會有好成績, 心存僥倖係無用嘅.
當年真係好天真咁以為 A-Level 可以好易咁混過, 其實 A-Level 真係無咁易過關. 到最後反而浪費左時間, 又枉廢左一切既機會.
為左遷就成績, 入左一科爛科 ... 而家返工比坐監更慘
假如當年能夠及時改正、真係努力讀書既話, 可能今日一切都好唔同 ... 一連串既錯就影響一生.
最近見倒一個英國既 program, 係我真係有興趣既 ... 八萬幾蚊兩年 intensive ...
結果到 deadline 都無報名. 我怕會失敗 ... 好怕失敗既感覺 ... 因為我未嘗過成功.

FB 上做左個性格測驗.
唔係果 D 得啖笑既測驗, 係有成幾百仔題目要答, 再加上一大堆唔識英文字.
不過我都只係答左卅條. 理論上答得越多, 就越可以準確反映一個人既性格嘅.
性格分析都幾準確
做完個測驗仲可以睇下自己適合讀乜學科. 原來我適合讀烹飪藝術喎, 其次居然係 Undecided 囉.
 都唔出奇啊. 我讀既都唔係我想讀既. 當年以我既成績, 就只可以入一間咁既爛大學, 再加一科爛科.
不過, 更奇怪既係, 個測驗話我啱讀 Graphic Design (第三)、數學 (第四)、經濟 (第五).
首先, 畫畫我從來無天份, 以前要美術堂要畫畫, 我都係抄. 數學, 我天加唔掂, 雖然會考都攞過 A, 不過真正既數學又點同會考果 D 數學比呢.
唔知如果當年我跟哩個次序來選 JUPAS, 結果又會係點呢

哈哈 ... 哈哈哈 ... 推左 D 野畀人, 成個人舒服哂.
不過好快就轉番來我度
都好嘅, 起碼有起事上來多一個人咩鑊嘛
 但係年頭趕頭趕命做既野, 有人有意見囉.
唔係話唔可以有意見, 只不過係你有無盡倒力去了解明白我做既野先囉. 好似我要你去花時間去明白 (學識) 一樣野係我既錯咁.
我花左咁多心機, 無理由我識既野, 你會唔識囉, 而且我又唔係 PhD doctor 囉. 定抑或 PhD 真係識好少野呢

屋企樓下隻又哩埋左響冷氣底下瞓覺.
 
佢好似好鍾意響果處瞓覺, 可能因為果處又暖暖地, 又無人可以搞倒佢.

新入手左部 SE T707  ... 粉紅色 ... 好 shocking 呢
  
中間粒少紅色按鈕更加 pinkie 呢.

唔洗兩千蚊就有 3G 加 HSPA 用, 好啱我既 budget 呢

Size 只有包紙巾咁大倒啦. 重都唔夠 100g, 最啱我既要求
走左去誠哥間電器舖度買, 經過一番唇舌都係得遮一把、SE 電話繩一條、Eagletec M2 card reader 一個、二人 share headphone 插一個 ... 囧

夜晚用新電話試影一張相 ...

 無閃光燈同自動對焦, 就係難控制 D ... 3M pixels  影出來既相好似都無 LG 2M pixels 影出來咁高質素呢
無錯, 用生滋電話順便轉埋台──轉去 VOD. 同 CSL 講 bye bye

有日有 20MB 生滋 data 可以用, 但規定只可以用來睇網頁, download e-mail attachment 都唔得.
超多條款同限制 ... 囧 ... 唔係好明乜叫 download file 囉
似乎電話裡面個 Facebook application 都唔用得喇

 Microsoft 要摺埋 Money ...
無左 Microsoft Money, 只有 Intuit Quicken 可以用.
Download 左個九十日試玩版返來, 跟足指示將 Microsoft Money 既 data 轉做 Quicken format, 但係個 converter 出 error 囉. 仲要係 serious error 呢.

咁多 data 都 convert 唔倒, 都唔知點算好.
對 Intuit 好失望囉. 希望有公司會同 Microsoft 買左個 Money 繼續 develop 啦.

收倒新世界寬頻封重要通知, 話唔再招乎我住果處喇.
可能家用寬頻真係無肉食啦.
又或者我可能係新世界寬頻, 響我住果處既唯一一個用戶, 淨係招乎我一個成本太貴啦.
轉去 Netvigator ... 我又唔係太想 ...
考慮轉用 HSPA 3.6MB 寬頻上網, 睇過哂 D 用家意見──CSL 用唔倒 VPN, Three 勁慢, PCCW 貴──結論好似只有 VOD 可以選.
問題係手提而家用緊 VOD, 如果 HSPA 寬頻又用埋同一間公司, 萬一個生滋 network 出事, 即係乜都無得用囉.
要七月第一個禮拜做好決定 ... 好煩呢.

無得再用新世界寬頻, 即係連 nuWorld 信用卡都唔可以再用.
發現原來新加坡發展銀行既 AmEx 卡每簽二百五蚊就回贈兩蚊 ... 好抵呢.
哈哈  要多加利用呢

好失望 ... 好失望 ...
對自己好失望.
有熱血、有理想, 原來係無用㗎
因循苟且先至係王道.
Change 從來都唔易, 但原來努力過後, 結果所有野都要 revert 番哂.
係唔應該意氣用事 ... 重大既決定係唔應該響心情不穩既時候做.
但係 ... 太多事令我失望 ... 太多事睇唔過眼 ... 太多心機已經被枉費
我要 CHANGE! 搵工去!

(Source: The Simpsons, Season 16, Episode 12)

廿年前既今日── 1989 年六月四日 ── 共產黨用軍隊、用子彈、用坦克殺死數以百計手無寸鐵、只為中國未來有美好發展既中國年輕一代.

我 ... 看見了 ...
我 ... 痛心了 ...
我 ... 悲慟了 ...

廿年過去 ...
未敢忘記 ... 就算有人刻意竄改歷史.

可惜有人以為自己能代表香港七百萬人.
有人以為經濟發展可以蓋過殺人事實.
有人以為以八萬五既手法處理, 事情就好似無發生過一樣.
1989 年六月四日清晨, 我地從電視上見倒無數中國學生被共產黨既軍隊所殺, 天安門廣場成為殺戮既廣場, 槍聲從不停止, 廣場上充滿彈痕, 鮮血流滿地 ...
全部都係事實 ... 我地親眼睇倒哂.

有人話, 果時天色太黑, 佢睇唔清楚天安門廣場上發生乜事, 唔知有學生被殺.
你係睇唔見, 因為你連事非黑白都睇唔見.
美國入侵伊拉克既時候, 都係天色黑暗, 但全世界既人都知伊拉克被入侵, 有伊拉克人民被殺.
你睇得見嗎?

有人話佢只見北京市民打軍人.
事實係真係有發生, 但你知道共產黨既軍人做過乜嗎?
第二次世界大戰時, 中國人對抗入侵者, 難道係錯嗎?
1989 年春天, 北京學生只為中國未來發展發聲, 從來未用過任何武力, 只有靜座、絕食.
共產黨反用武力, 而且用軍隊殺死天安門廣場上既學生. 要麼為自己既安全作出反抗, 要麼在日出前死在廣場上.

有人話幕後黑手其實係鄧小平; 而鄧小平作為中國改革開放既總指揮, 共產黨唔可以批評鄧小平既錯誤.
難道你知道而且親眼目睹你父母殺人, 你會因為佢地生你出來又養大你, 你會去包庇佢地?
又假如被殺既係你既兄弟姊妹呢? 你可能會係下一個, 你會點做?
我地要公義, 將真相公開, 不論佢係乜野人, 曾經做過幾多件偉大既事.
做錯事就要認──哩個唔係我地既父母從小就教我地既道理嗎?
錯既野無可能忽然會變成正確. 如果係既話, 我會覺得好可悲.

廿年過去 ...
幾多死去既人被抹黑, 仲未能尋怨得說.
我地唔想再等多廿年!
共產黨就響今日出來承認自己既錯誤吧!

【民主歌聲獻中華】
 

唔知係咪我既 Messenger 中左毒 ... 五月 17 日 (星期日) 晏晝六點幾有人用左我既 Messenger account 來 send e-mail 畀我 contact list 上既所有人囉
廿五號又來過. 真係唔知係中左 Messenger virus, 定係個 password 畀人偷左

真係無見過 D 人咁鳩串既
一般冷氣吹倒自己, 都只會認倒霉唔好彩. 條仆街居然飛象過河, 申手過來後面來閂人地個冷氣, 仲串串貢.
我人少, 無得兇你, 你串爆好野. 如果我人多, 你一定不得好死㗎.
大熱天時, 你唔吹得冷氣就咪鳩搭有冷氣既車啦, D 人有錢就越來越串串貢!

一落樓就畀冷氣滴水滴中眼 ... 真係仆佢個街

響百佳發現有法國 Mont Saint Michel 既曲奇賣 ... 一共有四種口味.
先來幫佢地影張沙龍照, 跟佳當然係買一包朱古力曲奇返屋企慢慢嘆啦.
  

Mont St. Michel 真係好靚㗎.
 
尤其係夜晚開左燈既時候 ...
 
當然仲要配合埋我無既攝影技巧, 先可以將靚既野完整留落來啦.

最近開始睇 Stephen Clarke 寫既 A Year in the Merde.
形式同 Peter Mayle 寫既 A Year in Provence 好相似, 唔同既可能係一個故事背景響普羅旺斯, 另一個響巴黎, 而且主角仲未結婚.
睇左 A Year in the Merde 既九、十月, 發現 Stephen Clarke 既寫作手法幾風趣, 比 Peter Mayle 平實記事既方式更有可讀性. 唔知 A Year in the Merde 既作者係咪都係咁風流既人呢, 成日都諗著性.
而且 Stephen Clarke 筆下既巴黎應該比 Peter Mayle 既普羅旺斯更有真實性 (雖然 A Year in the Merde 只係一本小說), 畢竟 Peter Mayle 寫作既年代已經係上世紀.
真係好想再去法國玩  可以同心意相近既人一齊領略法國係一件愉快既事

Sigh  我真係搞唔掂 D data
快 D 搵人來打救我啦 ...

跟大陸 D 英文真係會死人.

佢可以賴話出廣告時無校對清楚啦.
但係一間做野咁唔小心既大陸公司, 佢既可信程度有幾多? 真係有目共睹囉 

美國第一大保險公司經紀s (有 s 既呢), 晨咁早就響雞店度開單.
可以見而家保險行業真係幾難拉食呢, 尤其係美國保險公司.
其實, 眾所周知美國第一大保險公司已經唔掂啦, 都唔明點解 D 人都仲落搭.
保險公司都係英國穩妥 D 啦

近距離影倒樓下隻貓貓 ... 響冷氣機底下呢 ... 可能果處暖暖地 ...
 
幾個禮拜前都有機會再近 D 影倒佢, 不過唔記得拎電話出來影.
而家用電話影出來既效果好差, focus 唔倒嘅, 又 zoom 唔埋去

樓上裝修 ... 又鑽又揼
出去食飯, 發現原來中學卅周年. 喔 ...
同中學 D 人都完全無聯絡喇, 似乎只有我係咁霉.

諗-ing ...
好唔好再自己一個人遠行呢?
但係今時既環境又同十年前唔同 ...
唔知呢 ...

一齊來聽下歐洲既好歌唱 ...
 

日文原來真係好鬼易 ...
  

今次人類豬流感出現, 權哥都唔敢再鬆懈, 一於攬哂上身來做, 非常 serious.
有維景酒店既住客覺得香港政府太 over, 只係因為你未經歷過沙士既慘痛教訓. 萬一過兩日你真係賴左野, 你又會覺得自己太唔好彩, 還是政府無做好本份呢?

近排好興講正能量.
     
片段中既家彣已經響二月 25 日離開人世

被放飛機 ... 唔知算係避過一劫, 還是 the worst is yet to come.
人越大, 真係會越怕死.
如果係以前, 可能會大無畏; 但而家既我, 真係會貪生怕死.
又唔知到幾時先能夠成行喇.

唉 ... 我都話左我既數學唔好㗎啦.
完全搞唔清 1/2 + 1/3 + 1/3 同 (1 + 1 + 1) / (2 + 3 + 3) 既分別 ... 好似一樣啫.
 唔好要我計數!

近來好似又唔係瞓得幾好.
唔知係咪因為夜晚有 D 熱
不過, 心情又有 D 困擾 ... 已經努力忘記, 點解仲要響我快要忘記得一乾二淨既時候, 再出現呢?!
係咪要玩我???

無意中響 FB 得知中四、五教我地數學既 miss, 已經響 2008 年十二月離世.
...
人生係短暫既. 所以, 我覺得 ... 應該響人生短暫既時間裡面做自己想做既事, 尤其係壞事

玩得耐 UNO 漸漸覺得唔好玩, 唔係 D 人出牌太慢就係太串.